28 Ionawr 2008

Ewch amdani yn Sioe Awyr Agored yr Arolwg Ordnans 2008

Mae Sioe Awyr Agored yr Arolwg Ordnans yn ôl ar gyfer 2008, a bydd yr asiantaeth mapio cenedlaethol a’i phartneriaid ar gael i arddangos y prif ddyfeisiau diweddaraf ym myd hamdden awyr agored.

Cynhelir y sioe rhwng 14 a 16 Mawrth 2008 yn NEC Birmingham, ac mae’n ymfalchïo mewn dewis helaeth o offer newydd, y cyfle i ddysgu sut i blymio, dringo wal iâ, dysgu sgiliau goroesi a chyfarfod â’r enwogion Bear Grylls a Kate Silverton, ymhlith llawer mwy.

Bydd yr Arolwg Ordnans yno i arddangos ‘explore’, sef y wefan gymunedol awyr agored sy’n annog pawb i lanlwytho’u hoff lwybrau ar-lein, rhannu ffotograffau a dechrau blogio â miloedd o unigolion eraill sydd o’r un feddylfryd.

Ochr yn ochr â’r ystod lawn o fapiau’r Arolwg Ordnans, bydd y gyfres newydd o OS Landranger Map – Active hefyd ar gael am bris gostyngol arbennig i ddeiliaid tocynnau. Dyma 25 teitl mwyaf poblogaidd mapiau OS Landranger mewn fformat ‘Active’ arbennig, sy’n golygu eu bod yn wydn, yn amlbwrpas ac yn wrthdywydd – yn ddelfrydol i’w defnyddio waeth beth yw'r tywydd.

Dywed Vanessa Lawrence CB, Prif Gyfarwyddwr a Phrif Weithredwr yr Arolwg Ordnans: “Trwy noddi’r Sioe Awyr Agored unwaith eto yn 2008, rwy’n gobeithio y gallwn ni barhau i ysbrydoli pobl i roi cynnig ar weithgareddau newydd a mwynhau gweithgareddau hamdden newydd, boed dan do neu yn yr awyr agored.

“Ar ddechrau blwyddyn newydd, mae llawer ohonom ni’n addunedu i ddod yn heini ac yn actif, ond gall yr adduned honno ddod yn fwyfwy anodd wrth i’r flwyddyn fynd heibio. Efallai mai ymweliad â Sioe Awyr Agored yr Arolwg Ordnans ym mis Mawrth eleni yw’r ysbrydoliaeth berffaith sydd ei hangen arnom ni i gyd i ddal ati.

“Mae’r sioe yn gyfle gwych i arddangos yr hyn sydd gennym ni a’n partneriaid i’w gynnig, o gynnyrch cyfeiriannu lloeren a’r wefan gymunedol gwe 2.0, ‘explore’, i’r ystod lawn o’n mapiau papur tra hoff.”

I’ch helpu i wneud yn fawr o’ch mapiau Arolwg Ordnans, bydd arbenigwyr awyr agored yn cynnig eu harbenigedd yn ystod gweithdai cyfeiriannu rhad ac am ddim yn Theatr yr Arolwg Ordnans. P'un a ydych chi'n ddechreuwr llwyr neu wedi hen arfer darllen map, bydd gennym ni rywbeth a fydd yn gweddu i'ch gallu.

Ar ben hyn, bydd cyfle ichi roi cynnig ar raffl wobrau i ennill gwyliau antur gwych yn y DU gyda theulu neu ffrindiau.

I gael mwy o wybodaeth am Sioe Awyr Agored yr Arolwg Ordnans 2008 ac i archebu tocynnau, ewch i www.theoutdoorsshow.co.uk

I roi cynnig ar ‘explore’ cyn y sioe, ewch i www.ordnancesurvey.co.uk/explore

---

Chief Press Officer - Scott Sinclair

Ebost: scott.sinclair@ordnancesurvey.co.uk

Ffôn: (+44) 023 8079 2265

Press Officer - Paula Beauchamp

Ebost: paul.beauchamp@ordnancesurvey.co.uk

Ffôn: (+44) 023 8079 2568

Ffacs swyddfa'r wasg: (+44) 023 8030 5295