23 Mawrth 2004

Yr Arolwg Ordnans yn cyhoeddi rhodd daearyddiaeth fwyaf Prydain

Y Gweinidog dros Ysgolion yn canmol cynllun

Mae’r Arolwg Ordnans yn cynnig map Explorer rhad ac am ddim i bob disgybl 11 oed ym Mhrydain Fawr o ddechrau tymor yr hydref 2004.

Cyhoeddodd Vanessa Lawrence, Prif Gyfarwyddwr a Phrif Weithredwr yr asiantaeth fapio genedlaethol, y cynllun mewn achlysur lansio yng nghwmni Stephen Twigg AS, Y Gweinidog dros Ysgolion. Disgyblion Ysgol Broomfield yn ei etholaeth ef, sef Enfield Southgate, oedd y rhai cyntaf i gael gwybod am y cynlluniau.

Dyma fydd y drydedd flynedd i’r Arolwg Ordnans gynnig map Explorer rhad ac am ddim i bob disgybl Blwyddyn 7 yn y wlad. Mae mwy na 1½ miliwn o blant eisoes wedi cael budd, felly dyma un o’r prosiectau adnoddau addysgol mwyaf o’i fath yn ysgolion Prydain.

Meddai Mr Twigg: "Bydd menter eleni yn helpu cannoedd ar filoedd yn fwy o blant ledled Prydain i ddarganfod bod mapiau yn hwyl ac yn werthfawr. Gan mai nhw fydd yn berchen ar y mapiau, byddan nhw’n gallu dysgu llawer yn fwy am eu hamgylchedd lleol, boed hynny yn yr ystafell ddosbarth neu gartref gyda’u teuluoedd."

Mae’r adborth mae’r Arolwg Ordnans wedi’i dderbyn yn ystod y ddwy flynedd ddiwethaf wedi bod yn bositif iawn, wrth i lawer o blant ac athrawon rannu eu profiadau o ddefnyddio’r mapiau rhad ac am ddim mewn amrywiaeth o bynciau fel hanes lleol, dinasyddiaeth a daearyddiaeth.

Meddai Vanessa Lawrence: "Yn dilyn cynllun eleni, bydd mwy na dwy filiwn o blant wedi cael budd o’r fenter yma. Mae’r mapiau rydym eisoes wedi’u dosbarthu yn werth mwy na £10 miliwn ac rydym wrth ein bodd ein bod yn gallu ymestyn y cynllun am flwyddyn arall."

Bydd gofyn i bob ysgol gofrestru ar ddechrau tymor yr hydref er mwyn derbyn eu mapiau erbyn y Nadolig. Nid oes yn rhaid iddynt wneud unrhyw beth ar hyn o bryd. Byddwn yn anfon y manylion archebu i bob ysgol unigol ar ddechrau tymor yr hydref.

Mae adnoddau a gweithgareddau yn cefnogi’r fenter mapiau rhad ac am ddim yn adran Help Gwaith Cartref gwefan ryngweithiol rhad ac am ddim yr Arolwg Ordnans ar gyfer plant, sef www.ordnancesurvey.co.uk/mapzone

Mae gwybodaeth bellach am fenter Mapiau rhad ac am ddim i ddisgyblion 11 oed ar gael yn www.ordnancesurvey.co.uk/freemapsfor11yearolds.

---

Chief Press Officer - Scott Sinclair

Ebost: scott.sinclair@ordnancesurvey.co.uk

Ffôn: (+44) 023 8079 2265

Senior Press Officer - Kate Kemp

Ebost: kate.kemp@ordnancesurvey.co.uk

Ffôn: (+44) 023 8079 2977

Press Officer - Paula Good

Ebost: paula.good@ordnancesurvey.co.uk

Ffôn: (+44) 023 8079 2635

Press Officer - Paul Bauchamp

Ebost: paul.beauchamp@ordnancesurvey.co.uk

Ffôn: (+44) 023 8079 2568

Press Office Co-ordinator - Pauline Hand

Ebost: pauline.hand@ordnancesurvey.co.uk

Ffôn: (+44) 023 8079 2251

Ffacs swyddfa'r wasg: (+44) 023 8030 5295